Kryetari i Aleancës për Ardhmërinë e Kosovës, Ramush Haradinaj në një konferencë për media deklaroi se ekziston mundësia reale që nesër të mos mbahet vazhdimi i seancës konstituive.
Haradinaj tha se janë në konsulta të vazhdueshme me të gjithë të interesuarit që duan dalje nga kriza institucionale, edhe me AKR-në e Behgjet Pacollit.
“Po më vjen keq për kohën dhe shtyrjen që ka ndodh deri më tani, nuk ndihem mirë që po ndodhin këto shtyrje, tjetra është se jemi ende në përpjekje që nesër të jemi në seancë por ekziston mundësia reale që të mos mundemi të fillojmë…”, ka thënë Haradinaj.
Ai tha se tani nuk janë në pyetje numrat e deputetëve, por mundësia për të krijuar një qeveri gjithëpërfshirëse.
“Nuk po bëhet fjalë vetëm për 61 deputet, sepse ndoshta ishim në punë sot. Arsyeja është pse po shkojmë në këtë rrugëtim të tillë dhe po marrim më shumë kohë për një qeveri gjithëpërfshirëse, një qeveri e aftë me iu bë ballë temave që e presin në vend dhe është interes i vendit’, ka thënë Haradinaj.
Ndryshe, kryesuesi i Kuvendit, Adem Mikullovci ka caktuar për nesër vazhdimin e seancës konstituive me kërkesë të PAN-it.
