Në kryeqytetin e Irakut, Bagdad, është organizuar ceremoni mortore për komandantin e Forcave Kuds të Gardës Revolucionare të Iranit, Qasem Soleimani, dhe nënkryetarin e grupit Hashd al-Shaabi të mbështetur nga Irani, Abu Mahdi al-Muhandis, raporton Anadolu Agency (AA).
Në ceremoninë mortore në qendër të kryeqytetit morën pjesë kryeministri i Irakut, Adil Abdulmehdi, zyrtarët qeveritarë, komandantët e grupit Hashd al-Shaabi dhe qindra milicë dhe civilë.
Shpesh herë gjatë ceremonisë u brohoritën slogane si “Jo Amerikës”, “Jo Izraelit” dhe “Djalli më i madh Amerika”.
Pas ceremonisë kufomat do të dërgohen në qytetin e Qerbelasë. Kufoma e al-Muhandis do të varroset në Najaf.
Ndryshe, dje në sulmet ajrore pranë Aeroportit Ndërkombëtar të Bagdadit është vrarë komandanti i Forcave Kuds të Gardës Revolucionare të Iranit, Qasem Soleimani, dhe nënkryetari i grupit Hashd al-Shaabi të mbështetur nga Irani, Abu Mahdi al-Muhandis.
Në sulm gjithashtu kishin humbur jetën 10 persona, në mesin e të cilëve 5 shtetas të Irakut.
Lideri suprem i Iranit, Ayatollah Ali Khamenei, në deklaratën pas incidentit tha se “një hakmarrje e hidhur po i pret kriminelët”.
“Vdekja e tij nuk do të ndalojë punën e tij, rruga e tij nuk do të bllokohet”, shtoi ai.
Udhëheqësi suprem gjithashtu shpalli zi kombëtare për tre ditë në vend, ndërsa në vend të Soleimani ai emëroi gjeneralin Ismail Qaani.
